16/03/22 : Cunfarenza di stampa di "Parlemu Corsu!" in Aiacciu à pettu à a ghjunta di u ministru francesu di l’internu Gérarld Darmanin.
5 ori è mezu di sera.
Davanti à a Cullittività.
Priàmbulu : sulidarii di a famidda Colonna, dumandemu ghjustizia è virità com'è a dìcini i ghjòvani.
1) Aspittemu unu ingagiamentu francu di u Statu par ghjunghja da veru à una suluzioni pulìtica (aspittemu misuri cuncretti è un almanaccu pricisu).
2) Dumandemu à l'iletti corsi d'essa ditarminati par dumandà garanzìi à u Statu, par essa sicuri d'ùn perda u nosciu tempu cù 'ssi discursati.
3) In qualità di "Parlemu Corsu!" dumandemu chì a lingua corsa sighi à u cori di a suluzioni pulìtica ricerca (u Statutu di cuufficialità s’imponi di fattu)
4) Dumandemu à essa assuciati à i discursati à vena. Ùn irrimittimu mancu à pena in càusa a ligitimità di i nosci iletti. À u cuntrariu, pinsemu ch’eddi sò intirlucutori naturali, chjamati à niguzià cù u Statu ma dinò dimu chì da a cuncirtazioni a so ligitimità ni sarà rinfurzata.
A noscia intarvinzioni traduci a noscia vulintà di cuntribuì à fà di ‘ssu mumentu, un mumentu stòricu.
Istati 2021 : Leia FFRAAC - ParlemuCorsu!
FFRAAC è “Parlemu Corsu !”, una leia stretta
U Cullittivu “Parlemu Corsu !” faci a prumuzioni d’una sucità bislingua corsu è francesu, è pugna di cuntribuì à a so rializazioni par vìa di parechji azzioni. Pà u Cullittivu era ividenti chì ci vulìa à travaddà cù i fieri, parchì sò loca chì tòccani mori aienti, à tempu loca d’attività icunòmica è vitrini d’un patrimoniu isulanu. Or pà a FFRAAC dinò, prumova l’usu di a lingua corsa era una ividenza, parchì hè a più bedda manera di muscià chì a ropa è l’arti ch’edda voli metta in valori, sò arradicati à un tarritoriu. Currispondi à a vulintà di a FFRAAC chì cerca à assicurà una trasmissioni… D’un cantu si cerca à trasmetta un sapè fà, è da quiddu altru cantu si cerca à trasmetta a lingua. Infatti, i dui sò intricciati è in fin’ di contu, una cullaburazioni FFRAAC, “Parlemu Corsu !” hè lògica è naturali.
Ciò ch’emu fattu.
Al di là d’animazioni puntuali in certi fieri, “Parlemu Corsu ! ” avìa sceltu dui loca, Aregnu è Filitosa, par fanni dui mudella di cursizazioni : à traversu a signalètica, presi di paroli, attella varii, animazioni zitiddini, ghjocu interattivu è cuminicazioni.
Ciò ch’emu privistu di fà.
Da tutti l’iniziativi di cursizazioni quidda chì t’hà di più pesu hè forsa quidda chì pirmetti di fà risunà ad alta boci a lingua corsa. Emu privistu tandu di metta in piazza una furmazioni par aiutà l’animatori d’una fiera è tutti quiddi impignati à a so rializazioni, à sprìmasi in corsu. Sò mubilizati, par cumincià, 2 furmatori pà una quindicina d’imparanti durenti à 36 ori. D’uttrovi principiemu.
Ciò chì si pudarà fà.
Una volta ch’eddi sarani furmati l’animatori è altri parsunali, circaremu à giniralizà tutti l’azzioni di cursizazioni à tutti i fieri. Si prufittarà sta volta di i risorsi umani di i fieri cù a vulintà di renda pirenna l’iniziativi.
Ropa di qualità è lingua viva sarà a noscia divisa !
