24/10/17 : cuminicatu à pettu à a publicazioni di u Nutiziali
CUMINICATU DI U CULLITTIVU « PARLEMU CORSU ! »
U Cullittivu « Parlemu Corsu ! » si ralegra di a publicazioni in lingua corsa di u misincu « U Nutiziale ». Filiciteghja u cutidianu Corse-Matin è i so ghjurnalisti chì ani purtatu stu prugettu.
Parlà di tuttu in lingua corsa. Metta à paru a noscia lingua à tutti l’altri senza cumplessa. Avè una visibilità maiori par aiutà à a sparghjera di u corsu. Dà a vulintà à tutti di praticà u corsu fendu capì chì l’affari pidda impurtenza è ch’eddu và insembu cù una mossa ginirali…
Corse-Matin hà rillivatu a sfida è salutemu a so cuntribuzioni à a criazioni d’una sucità bislingua.
È puri, tuttu inghjunu si ni sarà accortu è parechji sò quiddi chì a ci ani ditta : solu u parlà cismuntincu, da u tìtulu di u ghjurnalettu à u cuntinutu di l’artìcula, hè statu adupratu.
Si sà chì, da u principiu, « Parlemu Corsu ! », pugna di rispittà a pluralità di a lingua corsa : inghji azzioni, inghji publicità d’un ivinimentu, inghji affissettu hè dittu o scrittu in u parlà di u locu ‘d’eddu si passa. I nosci appiccicatoghja, i nosci sciarpi sò in dui virsioni (Sucità è Sucetà bislingua) è a parità di i variità si ritrova ancu in i paroli chì cumpònini u nosciu logò.
Ùn dupitemu chì Corse-Matin sà quantu eddi sò attaccati i Corsi à i so parlà. Sà chì a so rispunsabilità hè tamanta di pettu à u so nùmaru di littori : quidda di pudè muscià l’asempiu cù i so scelti linguìstichi…
Hè sicura chì a siconda idizioni di u Nutiziali pò essa l’uccasioni di muscià a ricchezza di a noscia lingua, fendu sta volta una publicazioni solu in u parlà pumuntincu (principiendu cussì una altirnenza rigulari) ! È spiremu dinò di ritruvà a lingua corsa in a so svariatezza in parechji artìcula di u cutidianu !
Emu sempri dumandatu chì u corsu sichi rispittatu à pettu à u francesu, è ‘ssa dimarchja ci voli ch’edda si ritrovi in a primura di i diffarenzi linguìstichi di a lingua corsa…
Avviva u misincu « U Nutiziali » è tutti l’altri media, attori di a sparghjera di a noscia lingua !
Avviva a lingua corsa, ricca di a so svariatezza !
20/09/17 : azzioni "Basta a cumedia" à nantu à u tettu di u Ritturatu
LINGUA CORSA UBLIGATORIA À U CULLEGHJU È À U LICEU !
UN PIANU DI FURMAZIONI PÀ I INSIGNANTI DI U SICUNDARIU !
12/09/17 : prisintazioni di u Prutucollu à a CTC cù i so prumurori baschi
…davanti à a Cumissioni di u Svilupu Suciali è Cuturali + u Cunsigliu Icunòmicu Suciali è Culturali + l’Assamblea di i Ghjòvani
- A dimarchja ci cunveni parchì :
. s’appoghja à nantu à i dritti di l’Omu è difinisci un drittu pà i lingui minurizati
. hè u fruttu di a sucità civili.
. teni contu di rialità diffarenti.
. u ducumentu finali hè più ambizoisu chè quiddu di a Càrtula Aurupea.
. u scrittu hè chjamatu hà duvintà unu scrittu di rifarenza (difesu da sperti ghjurìdichi)
. si pò spirà ch’eddu sarà un arnesi par fà prissioni à nantu à i stata è guverna cuntrarii à u spannà di i lingui minurizati.
- Da ‘ssu Prutucollu ritinimu in priurità :
. ch’eddu voli agì pà a missa in piazza d’una pulìtica di richjappu stòricu. Si tratta di misuri pusitivi di currizzioni è di finanzamenti cunsiquenti.
. ch’in l’iducazioni prumovi l’immirsioni è a furmazioni di l’insignanti è altri parsunali.
. ch’edddu dumanda a furmazioni di modu ginirali (pà l’amministrazioni, i impresi, in i cuncorsa è pà i diaspurà).
. ch’eddu s’accupa di a visibilità di a lingua à traversu a tupunimìa, l’amministrazioni, in u spaziu pùblicu è privatu.
. ch’eddu hè pà un cundiziunamentu di l’aiutu in u mondu icunòmicu, pà i media privati è pà a criazioni culturali.
. ch’eddu teni contu di u bisognu di rispittà i variità dialittali (puntu spicificamenti aghjustatu dopu à una argumintazioni di u Cullittivu).
- In Còrsica chì si ni faci ?
. Intantu di pudè fallu appiigà sanu sanu è d’uttena i mudificazioni ligislativi chì l’accumpagnarìani è unu statutu di cuufficialità, ci tocca à cuntinuà à fà. Rinvìa tandu à i pruposti di u Cullittivu à a Cullittività Tarrituriali (rializati di frivaghju 2017, à u Sirviziu Lingua è Cultura Corsa).
. Ci tocca à veda in chì modu u Prutucollu pò aiutà à a missa in piazza di parechji di i misuri dumandati da u Cillittivu, frà altru à traversu un accostu in funzioni di i dritti linguìstichi.
. U Prutucollu ci pò pirmetta di muscià i lìmiti d’una pulìtica linuìstica senza cuufficialità.
