Participazioni à u 3u cumitatu di pilutaghju "Paesa è cità immirsivi"
Màrcuri l’8 d’aprili 2026 : participazioni à a terza adunita d’u COPIL (cumitatu di pulitaghju Stampiglia “Paesa immirsivi”), cù a prisenza di Micheli Leccia chì farà mori intarvinzioni cù mori rimarchi è mori pruposti :
| Rimarchi | Pruposti |
| Bisognu di pricisioni à nantu à l’allarghera d’una cumuna à d’altri cumuni.
A intercumunalità risica di cumplicà a littura è annigà u impegnu d’a cumuna chì devi firmà à u cori d’u dispusitivu.
Truvà riprisintanti d’i sittori tocchi hè troppu pisenti à più forti raghjoni s’eddi dèvini participà à una squatra di travaddu di modu rigulari. Si pò prupona ma ùn devi essa una ubligazioni.
U rifarenti ùn pò essa solu d’u cunsigliu municipali. Devi essa d’a cumuna ma pò essa ancu d afora à u cunsigliu.
Pricisà di più chì a stampiglia ùn hè data chè s’eddi sò tocchi tutti i sittori. A so attribuzioni devi da veru currisponda à isigenzi alti.
Chì u rifarenti si primuressi di l’uttimizazioni d’i meza dati à a scola par cundùciala à participà à u dispusitivu.
Chì u rifarenti si primuressi cù i cuntatta ch’eddu pò piddà è uttena, di cunvincia ancu a ghjesia di participà à a cursizazioni di u cutidianu di l’amministrati. | Una adunita d’i tutti i rifarenti cù u Cumitatu di Pilutaghju (par iscumparta i spirienzi è par mutivalli è falli capì ch’eddi participèghjani à una mossa glubali di primura par l’avvena d’a lingua al di là d’u so paesu).
Ghjudicà dinò (par uttena a stampiglia) i presi paroli da l’astituziunali è altri parsoni cù rispunsabilità par ch’eddi dèssini l’asempiu è par dumandalli d’affissà una cuirenza cù a pulìtica missa in piazza.
Ghjudicà ancu (sempri in u quatru d’una uttinzioni d’a stampiglia) i capacità d’a cumuna à crià uccasioni par fà uaduprà u corsu da i so amministrati (si tratta di passà da l’affissera è da a tiurìa acquistata à i furmazioni à una missa in pràtica).
Scriva di manera chjara chì a puilinumìa devi essa rispittata in inghji cumuna.
Pà a candidatura essa isigenti à nantu à l’ugittiva à tuccà ma micca isigenti à nantu à a ridazzioni di u cartulari (ch’eddu ùn sighi un castigu ammistrativu).
Fà una riunioni par discorra à nantu à u cuntinutu di l’accumpagnamentu chì sarà rializatu.
|
Cuntribuzioni à u COPIL
02/03/06 : cuntribuzioni “Parlemu Corsu !” à u Cumitatu di pilutaghju
Pà ‘ssu sicondu scontru di u Cumitatu di pilutaghju, si pò ritena tandu :
- Par no, à ”Parlemu Corsu !”, ancu sì i sforza fatti da una cumuna par uttènala dèvini essa presi in contu, a stampiglia “Paesa è cità immirsivi” ùn ci ni pò essa chè una.
- Si poni dunqua difinì parechji nivedda d’impegnu :
. Impegnu Gradu 1 (cuntinutu à difinì)
. Impegnu Gradu 2 (cuntinutu à difinì)
. Impegnu Gradu 3 (cuntinutu à difinì)
…
è in fini :
Stampiglia “Paesa è cità immirsivi” !
Pudemu difinì una priurità di l’affari à rializà ma nanzi à tuttu, ciò chì devi ditarminà un gradu, hè a quantità di i rializazioni. Più sò numarosi è cumpletti è più ci avvicinemu d’a stampiglia.
Par ciò chì tocca à u cuntinutu ci sò parechji àcchisi à sfruttà :
- Signalètica (tupunimìa stralucali, discrittiva, di sirviziu)
- Cumercia (drentu è fora)
- Astituzioni (pà a cuminicazioni interna, internet, pustali, à i media, i presi di paroli)
- A scola (immirsioni…)
- Associa (cuminicazioni…)
- Attività culturali è spurtivi (cuminicazioni, animazioni…)
- A furmazioni (d’i parsunali, d’i binèvuli, d’i citadini)
- L’uccasioni (dati à i citadini par falli sprìmasi in corsu)
Pà u ditagliu si pò fighjulà a Càrtula ilaburata guasgi 20 anni fà è ben intesu i misuri sugiriti da “Parlemu Corsu !” (in particulari 1, 2, 3 è 7) in u nosciu pianu ch’emu prupostu à l’iletti di maghju 2025. Avìami scrittu ch’è no aspittàiami meza pà pirmetta à a lingua corsa di vèdasi è di sèntasi in carrughju à u più prestu, di manera significativa. Avìami pricisatu in chì cunsistarìa :
- Par fà veda a lingua, ci voli à circà à fà traducia tuttu ciò chì pò essa traduttu, fora è drentu à un cumerciu, un urganisìmu, una struttura spurtiva, un distributori di muneta… (poni essa cuncirnati cunsigni di sicurità, listina di risturanti, varii infurmazioni à nantu à l’itichetta d’un pruduttu corsu…). Pocu à pocu, u mìnimu cosu scrittu in francesu devi avè u so doppiu (più visìbuli) in corsu o simpliciamenti diessa rimpiazzatu da u corsu. Si pò ancu rializà una prisenza scritta isagirata (signalendu affari chì in francesu ùn ci sarìa bisognu di signalà) ma nicissaria par muscià chì oramai u corsu rifala in carrughju.
- Par fà senta u corsu, ci voli à sbrugliassi par truvà loca indu’ si pò intruducia : drentu à i cuddatoghja di i casamenta, drentu à i carra, drentu à u trenu, drentu à i supermarcata, drentu à un ginnasu, drentu à unu stadu… senza sminticassi di l’ivinimenta spurtivi o culturali… U corsu ùn si devi micca solu senta quandu l’aienti ni fàcini a scelta (stendu à senta una mùsica, una imissioni radiò o di tilivisiò…) ma dinò si devi senta senza ch’è a dumandessi, parchì li vulemu fà riacquistà una piazza di primura in tutta a sucità.
U cuncettu d’immirsioni hè d’una impurtenza maiori pà i risultata ch’eddu pò purtà è a dinàmica ch’eddu pò inghjinnà… Allora incuragimu è aiutemu à a rializazioni di l’immirsioni, ma par ùn disprizzialla micca, firmemu isigenti in quantu à l’attribuzioni d’a so stampiglia.
Quattrèsima edizione di a Currilingua
Micheli Leccia
U 28 di settembre di u 2024
Sartè
Cavru
12070€
accolti
67
chilometri
100
cumpradori
230
curridori
35
binèvuli è motards di sicurità
U cumpare
Per a prima volta, a Currilingua hà un cumpare : Jean-Charles Papi !
“Un ringraziamentu maiò à tutta a squadra di Currilingua pà issa bedda manifestazioni è u travaddu di prima trinca à prò di a noscia lingua. Socu fieru d’essa u cumpari di a quarta edizioni.“
Jean-Charles Papi
U testimone
Arburu testimone realizatu da Johanna-Rose LECCIA di Cavru.
Pulitu è untu d’una prutezzione, hè lebbiu è si tene bè in manu.
Hè fattu di legnu d’albitru, un arburellu simbulu d’amicizia è di spartera… sò e so fronde è i so bachi chì sò rigalati in e case per Capu d’annu…
Pussede in cima dui pezzi di grossi stigli, simbulizendu l’anziani à quale tocca di trasmette a lingua à i più giovani, simbulizati tandu da dui stigli più chjuchi…
Rittrati di l’edizione
Terza edizione di a Currilingua
Micheli Leccia
U 1ma d'uttobre di u 2023
Bunifazziu
Sartè
12995€
accolti
55
chilometri
114
cumpradori
200
curridori
40
binèvuli è motards di sicurità
U testimone
L’arburu testimognu di questu annu hè fattu di scubidù. Hè statu realizatu da Jason Lescombes.
Una vera opera d’arte…
Rittrati di l’edizione
Seconda edizione di a Currilingua
Micheli Leccia
U 26 di ghjugnu di u 2022
Aleria
Bunifazziu
21345€
accolti
101
chilometri
174
cumpradori
300
curridori
40
binèvuli è motards di sicurità
U testimone
U testimone 2022 è a mutivazione di l’artistu creatore, Marc-Antoine Kochert
“Prima aghju cercu à fà una branca secca… ma u messagiu ùn mi parìa micca à bastanza pusitivu… tandu l’aghju mudificatu aghjustendu piccule fronde è frutti. Hè diventata una ramella d’olive, viva è piena à suchju chì ci tocca à curà è à trasmette !”
À u finale, una versione più lebbia è più pràtica per tene in manu hè stata pruposta da Marc-Antoine… Eccu u testimone una volta pintu
Rittrati di l’edizione
Prima edizione di a Currilingua
Micheli Leccia
U 4u di lugliu di u 2021
U Borgu
A Sulinzara
14005€
accolti
90
chilometri
114
cumpradori
270
curridori
40
binèvuli è motards di sicurità
U testimone
U testimone di a prima edizione, realizatu da Carlos Campos è da Cheyenne Texier.
Rittrati di l’edizione
A Currilingua
Micheli Leccia
Corsa sulidaria duve si compra u chilometru per pudè perticipacci (è aiutà à u finanzamentu di prugetti in lingua corsa).
Pùblicu toccu : da i cumpradori à i curridori, passendu per i sustenidori è i binivulenti, sò tocchi per avà 700 parsoni di modu direttu. Per vìa di i media parechji millai.
Interessu :
- accoglie soldi à favore di prugetti per a lingua corsa,
- impegnà a sucetà isulana per a promuzione di l’usu di a lingua corsa,
- crià una dinamica pusitiva in giru à l’usu di a lingua corsa.
Perspettive :
- accresce u percorsu (da 100 chilometri ghjunghje à più di 1000, po aghjustà i corsi di fora in u mondu sanu pà fa viaghjà u tistimognu parechji mesi è nantu à millai di chilomitri),
- diversificà e prove spurtive (à a corsa à pedi aghjustà u cavallu, a bissicletta è a vela),
- dà di più in più impurtenza à u spittaculu finale,
- impegnà sempre di più ghjente,
- raccoglie sempre di più soldi,
- finisce pè sensibilizà è impignà tuttu u populu corsu.
Videò Lingua
Micheli Leccia
Urganizà un cuncorsu di filmetti rializati in lingua corsa da cullegianti, nantu à un sugettu chì li piace. Serà uffertu, in cullaburazione cù una radiò, à quellu chì vince è à un adultu chì n’hà a rispunsabilità, a pussibilità d’andà à assiste à un evenimentu culturale o spurtivu (cuncertu, macciu, parcu d’attrazzione…) in i paesi eurupei vicini.
Publicu toccu : centinai di cullegianti.
Interessu : mutivà i sculari à impegnassi in a imparera d’u corsu.
Perspettive : fà cresce a messa in scena è a mediatizazione in giru à stu evenimentu per prumove sempre di più l’usu di u corsu.