08/04/21 : Missagiu di cuntintezza dopu à u votu, à l'Assamblea Francesa, di u votu pà i lingui rigiunali.
PRUPOSTA DI LECI PÀ I LINGUI RIGIUNALI : a immirsioni sarà pussìbuli in i scoli pùblichi !
U Cullittivu “PARLEMU CORSU !” si rallegra di u votu, in ‘ssu 8 d’aprili 2021, à favori di a pruposta di leci à l’Assamblea Naziunali Francesa, difesa da u diputatu brittonu Paul Molac, à u nomu di u gruppu “Libertés et Territoires”, par prutteghja è prumova i lingui rigiunali. U guvernu, cù u so ministru di l’Iducazioni Jean-Michel Blanquer in testa, era uppostu, frà altru, à l’artìculu 2 di ‘ssa pruposta di leci chì offri a pussibilità di praticà a immirsioni linguìstica (di modu rigulamintariu è micca solu à tìtulu spirimintali com’è avà) in i scoli, cullegia è licea pùblichi. Eppuri, l’amandamentu chì s’uppunìa à ‘ssu artìculu 2 hè statu righjittatu da i parlamintarii d’uppusizioni ma ancu di LREM ! Veni à dì chì a immirsioni sarà pussibuli ! Una vittoria !
Dèmuci i meza oramai di pudè unurà ‘ssa pubilità chì offri pirspittivi d’avvena pà a lingua corsa ! AVVIVA !
19/03/21 : cuminicatu dopu à u “rinculu” di u Statu pà u CAPES di corsu...
[CAPES DI CORSU : ci Ralligremu di u rinculu di u Statu è filicitemu i ghjòvani pà a so mubilizazioni…]
Nanzi à tuttu ringraziemu i ghjòvani ch’ani sappiutu mubilizassi è fà capì à u Statu chì eddi firmàiani ditarminati.
I presi di paroli di l’iletti ani avutu dinò u so pesu ben intesu.
Intantu, àghimi cuscenza :
- Ch’ùn si volta à u capes di nanzi à u 2013 (ch’era solu in lingua corsa cacciata a prova scritta di traduzzioni).
- Ch’inveci d’avanzà… u Statu ci faci sempri rinculà (pà u capes è altri cosi) è no spindimu a noscia inirgìa… par pugnà à u meddu di rimèttasi à niveddu…
