12/09/15 : sustenu à Corsican Talk Time in Portivechju
12 di sittembri scorsu, èrami quì (caffè Chez Maxime in Portivechju) par sustena una iniziativa à prò di l’usu di u corsu.
L’idea hè vinuta da Cameddu Biancarelli, chì in Argintina hà scupartu i Talk Time, mumenta d’immirsioni in un caffè, par imparà una lingua, mittendu in cuntattu lucutori cunfirmati è principianti, chì sapìani comu ritruvassi par vìa d’internet.
Cù u so cucinu Stèfanu Ciabrini ani allora vulsutu ripruducia i cundizioni d’imparera di u corsu, uffrendu un tempu di discursata in lingua corsa drentu à un caffè. I loca poni cambià è nisciunu sughjettu hè impostu. Quiddi chì sani parlà ùn càpiani una parola di francesu, l’altri fàcini com’eddi di poni… Cussì hè natu u cuncettu di Corsican Talk Time.
Filicitazioni à Cameddu è à Stèfanu ! U Cullittivu « PARLEMU CORSU ! » si duvìa d’incuraghjìsciali !
Ch’edda sighi una rièscita Corsican Talk Time è ch’edda aiuti u corsu à impatrunìsciasi dinò d’u carrughju !
U 4 di luddu 2015 : animazioni pà i ziteddi
L'altru ghjornu emu rializatu animazioni pà i chjuchi à l'uccasioni di i 1a "Scontri di u libru è di a storia" in l'Ìsula Rossa.
D'istati hè privista una Grossa Riunioni di travaddu par appruntà parechji azzioni da vena.
U 25 aprili 2015 : sulidarità cù i ghjòvani di a GI in greva di fami
A sulidarità ùn pò essa chè tutali cù i ghjòvani di a GI ch’ani impresu una azzioni curaghjosa pà a difesa di i dritti di u pòpulu corsu. Sò a cuscenza di u pòpulu corsu. Sò a Risistenza di pettu à un guvernu chì nega a sprissioni di a dimucrazìa in Còrsica : i rivindicazioni purtati da i ghjòvani sò tutti misuri vutati à l’Assamblea è idei sparti in a pupulazioni. Vargogna à ‘ssu Statu disprizzanti ! Filicitazioni à ‘ssa ghjuvantù !
U 19 d'aprili 2015 : riazzioni à u pianu "Lingua 2020" di a CTC
Ùn hè ora di piantà…
Avanzemu ! Avanzemu bè ancu ! Pàssani i nosci idei è parechji sò ripresi. È puri, ùn basta par risanà da veru a lingua corsa parchì fèrmani à fà sforza cunsidarèvuli à nantu à a furmazioni. L’immirsioni devi essa giniralizata à tuttu u primariu di sicuru è par ghjùnghjaci, ci hè bisognu d’unu statutu di cuufficialità pà a lingua. Statutu nicissariu dinò, frà altru, par uttena i meza di a so prumuzioni in u mondu icunòmicu è di manera più ginirali par garantì una vera parità di i dui lingui, corsu è francesu, in i so dritti è in u so usu. Intantu, ci ralligremu di i prugressa fatti è di veda tanti iletti sustena u pianu « Lingua 2020 ». U cumbattu ùn hè ancu à finì ma tutti sulidarii, u carrughju è l’astituzioni, semu cunvinti ch’è no riisciaremu à fà senta raghjoni à ‘ssu Statu disprizzanti, è tutti i meza nicissarii à a custruzioni d’una sucità bislingua strapparemu !
