10/02/16 : cuminicatu contru à a sarratura di scoli
Intantu chè militanti di a lingua corsa è attori di u so sviluppu, u Cullettivu Parlemu Corsu vole sprime u so sustegnu à e scole di Santu Petru di Tendu, Merusaglia è d’Aregnu. Omu sà chì e scole bislingue o micca, diventanu di più in più lochi induve a lingua corsa tene una piazza impurtante è i prufessori chì ci travaglianu, sò partenarii di u so sviluppu. Aldilà di stu fattu quì, e piccule scole di i paesi offrenu à i zitelli un insignamente di qualità è a pussibilità d’ingrandà in u so paese. Chjode isse scole ghjè caccià sta furtuna à sti zitelli chì seranu ubligati di piglià un trasportu per tuccà una altra scola. Chjode isse scole ghjè dinù caccià un pulmone à un paese, ghjè privallu di ste rise zitelline chì escenu mentre a recreazione è chì sanu incantà ogni stonda, ghjè tumbà pocu à pocu u paese. U Cullettivu sustene u muvimentu di cuntestazione di chjuvitura di ste scole è s’associa à tutte l’azzioni fatte in stu sensu quì. Lingua viva è scole aperte !
Cuminicatu di Bona annata 2016
A LINGUA CORSA, CIMENTU DI A CUMUNITÀ ISULANA
U Cullittivu « Parlemu Corsu ! » prega à tutti un bonu annu 2016. A Paci, a Saluta è una lingua corsa cimentu di tutta a cumunità isulana. Ch’edda sighi ‘ssa lingua in capacità d’adunì parsoni d’urìcini diffarenti ma chì tutti sò pronti à sparta un distinu cumunu.
Par ch’eddu ùn s’infrugnessi u razzìsimu in a noscia sucità, demu à a lingua corsa a forza d’impastà à tutti purtendu cun edda una cultura multisicularia.
Ramintèmuci chì ‘ssa lingua hè u fruttu d’una longa ivuluzioni com’è a ci poni attistà tanti paroli : ghjàrgalu parola cù una ràdica chì ricodda à a priistodia, vangad’urìcini girmànica, baracuccu chì ci veni da l’àrabu, tamantu da u tuscanu, carrughju da u ginuvesu, lindu da u spagnolu, manghjà da l’anzianu francesu, sinemà da u francesu cuntimpuranu... Di sicuru, nanzi à tuttu, hè una lingua impastata da u latinu ma micca solu… È puri una lingua ùn hè solu fatta da u lèssicu ma dinò da a so sintassa (a custruzzioni di i frasi), da a so funulugìa (a prununcia di i vucali è di i cunsunanti) o da a so prusudìa (l’accentu).
Ci tocca à strappà i meza di sparghja a lingua corsa in a sucità par ch’edda aiutessi sempri di più à « fabricà » Corsi à nantu à a tarra di Còrsica. Dèmuli un quatru ghjurìdicu è unu statutu valurizanti. Strappemu a cuufficialità ! In u 2016 più chè mai, firmemu mubilzati. Tandu, à tutti, dimu à prestu !