U cullitivu Parlemu Corsu
CHÌ VULEMU ?
Vulemu cuntribuì à l’ilaburazioni prugrissiva, in Còrsica, d’una sucità bislingua (Corsu/Francesu).
QUAL’ HÈ CHÌ CUMPONI U CULLITTIVU ?
Hè una adunita di parsoni è ancu d’associa chì si ricunnòscini in a dimarchja di u Cullittivu.
Oramai sò più di 800 i membra di “PARLEMU CORSU !” : 618 parsoni, 115 associa è 112 gruppa culturali o artisti.
Comu agiscia ?
- Fà à nantu à u tarrenu (Veda l’Archivi è I nosci prugetta).
Circhemu à muscià l’asempiu è à inghjinnà iniziativi in tutta a sucità isulana.
- Dumandà i meza ghjurìdichi, umani è finanziarii par pudè appiigà u nosciu pianu pà a lingua (Veda I nosci 16 pruposti rializati dipoi u 2007 è sempri d’attualità).
Circhemu à purtà una rivindicazioni di modu uriginali, fistiva è culurita senza isità à fà in furia colpa di forza par susprenda è intarpillà l’aienti.
- Travaddemu cù i riprisintanti di l’altri lingui minuritarii par arrichì a noscia dimarchja è acquistà di più pesu è ancu una diminsioni intirnaziunali
(Veda a pàcina “Lingui minurati è u “Prutucollu pà a garanzìa di i dritti linguìstichi”).
Umaghju resu à u Cullitivu
Connoscu un cullettivu
Chì più và, più ghjè attivu
Da i Corsi apprezziatu
È di core seguitatu
Mette la lingua à l’onore
Ci travaglia cù fervore
Parlemu corsu chjamatu
Si cumporta in suldatu
Difende a Cursichella
Vole esse sentinella
Milita cù devuzione
Contr’à l’acculturazione
Eccu cumu un professore
Da tant’anni cun ardore
Ind’a cruciata lampatu
Pè u corsu bè parlatu
Quant’ellu hà cumbattutu
È risultati ottenutu !
A so lutta face frutti
È ne prufittemu tutti
Cù issa battaglia pietosa
Altruista, generosa
È st’opera meritoria
Fermerà in a memoria
Nasce trà Micheli Leccia
È i scontri una treccia
D’amicizia ch’adunisce
Ingrenda è po fiurisce
Per chì lu corsu parlatu
Sia sempre adopratu.
Cathy Campana
u 29/04/23